கடைசிக்கு முந்தைய ஆசை

நரகத்திலிருந்து
விடுபட்டபோதிருந்த மகிழ்ச்சி
இப்போது இல்லை

சுவர்க்கம் என்றே
சொல்லுகிறார்கள் இதை

சோறும் தண்ணீரும்
சொகுசும் பன்னீரும்

எல்லாம் கிடைத்தால்
அதற்கு என்ன பெயர்?

எதையாவது நோக்கித்
தவமிருந்தால்
அது கிடைக்கும் போது இன்பம்

கிடைத்தபின்
இன்னொன்றை வேண்டித்
தவம்

கட்டக் கடேசி சொர்க்கம்
அப் பேரின்பம் கிடைத்தபின்
எதற்குத் தவம்?

மீண்டும் நரகத்துக்கே சென்று
தவமிருப்பான் மானிடன்

மலைஉச்சியை அடைந்துவிட்ட
நார்ஸிஸஸ் போல....