முடிக்கப்படாத கதைகள்

தொடங்கப்பட்ட கதைகள் எல்லாம்

முடிந்துவிடுவதில்லை

கதையில்

காட்டில் விடப்பட்ட மனிதன்

அங்கேயே அலைந்து கொண்டிருக்கிறான்

முடிந்த கதைகளிலும் கூட

சிலர்

என்ன செய்வதென்று

திகைத்து நின்றுவிடுகிறார்கள்

பக்கத்து வீட்டுப் பெண்ணைக்

காதலித்த விடலைப் பையன்

மீளாமலேயே தவிக்கிறான்

ரஜினி படங்களைப் போலவே

ஓரிரவில் பணக்காரனாகிவிட

சாகும்வரை

விரும்புகிறான்

கற்பனையாக நிகழ்த்தப்பட்ட

புரட்சியில்

விடுதலை நிகழாமல்

நிறுத்திவிட்ட எழுத்தாளன்

சாபத்துக்கு உள்ளாகிறான்

எக்காளத்துடன்

இரு கால்களில் நிற்கும்

குதிரையில் சிலைபோல

உறைந்து நின்றுவிட்ட மாந்தர்கள்

ஓவியமாகவோ

திரைப்படமாகவோ

கதையாகவோ அல்லது

தொடங்கி நிறுத்தப்பட்ட

குட்டிச் சுவர்போலவோ

நீங்கள் வடித்துக் கொள்ளலாம்

தங்களை முழுமைப்படுத்துகிறவர்களிடம்

அவையாவும் யாசிப்பது அதுவே